Deä glaa Michel därf des Jahr zsämm örschdn mal zä der heilichn Kommunion. Und da musser nadürlich a dävor zsämm örschdn mall zsämm Beichdn hie.

Deä Pfarrä ermahnd die Kinnä, dass sa aach ja ka Sündn vägessen dun, weil die örschde Beichd ja die wichdigsda wär.

Wie deä glaa Michel dann im Beichdschduhl hoggdd und sei Sündn rundäbedd, sachd er aach:

"Ich hab begehrd meines Nachbarn Weib."

Schimbffdd der Pfarrä "Was hasd du? Du Lausä bisdd doch viel zä glaa für södda Sündn!?! Lüch mich fei in deä Beichd ned a!"

Da greindd deä glaa Michel: "Abbä wenn ich's doch sach! Ich begehr unnäm Nachbarn sei Fraa. Ann jeden Sundach begehr ich sa, weil ihra Klöß vill bessä sin wie die unnärn!"

Die Köcha väm aldn Pfarrä sachd neulich zäm Pfarrä:

"Herr Paffä, sie ham übähaubdds ka Vädraun zä mir!"
"Des schdimmdd doch gar ned. Ich lass doch jedn Dach den Schlüsselbund mid alla Kerngschlüssel auf Essdisch lieng lassn!"
"Scho wahr, abbä fä die Schlüssel bassd ja kannä zsäm Opfäschdock!"

Deä Kümmersch Franz is fä deä Schdadd mal naus nei su a glaans Dörfla gfahrn. Wie er da su durchs Dörfla geloffn is, hadd er sich über des glaana Kerchla gewunnärt, weil des Dörfla doch scho a paar Häusla mehr ghobbdd hadd.

Wie er grad den Messner aus dem glaan Kerchla had kumma seng, hadd er na gfraachd, ob des Kerchla nedd a weng glaa wär.

Drauf had der Messner midm Aach gezwingerdd und gsachd:

"Wenn alla nei gehn, gehn freilich ned alla nei. Abbä weil ned alla nei gehn, gehn alla nei!"

Wie sa die Wallfahrtskerng in Mariaweiher renovierd ham, da war der Zibfls Wernä als Elegdriggä da und had Leidunga zieng gsölld. Weil deä Wernä abbä a Luddrischä war, hadder gemaand, er muss mid die aldn Weibä, die wo zsä deä heilichn Muddä Goddes gebedd habm, a wen an Schabernagg dreim. Wie amoll widdä su a allds Weib vorm Aldar gegnied is und gebedd had, had er sich hinderm Aldar väschdeggd und mid dumpfä Schdimm gsachd:
"Hier schbrichdd Jesus! Lass ab vo deinem Gödsndiensdd und beed nur mich an!"
Abbä des alda Weib had kaan Muckerä gemachd und fleißich weidä ihrn Rosenkranz gebedd. Des hadd den Wernä gfuchsdd und so hadd er noch amoll gsachd:
"Hier schbrichdd Jesus! Hab ich nedd gsachdd, du sollsdd kaana annärn Gödda nebä mir ham? Lass ab vo deinem falschen Gebedd und beed nur mich a!"
Abbä widdä had des alda Weib ich ned gerührdd. Wie er des dridda Mal widdä afanga wolld und gsachd had "Hier schbrichdd Jesus! ...", da is die Alde aufgschdanna und had zsäm glaan Jesuskind aufm Arm der Muddägoodes midm Fingä gedrohd!

"Bisdd du Lausä jedsärd amoll schdill! Sichsdd du nedd, dass ich grad mit deineä Muddä redd!"

Schdaffelschdaa aach nedd, nuch weidä naufwärds. ;-)

Des Görchla hoggd auf seim Keller und machd grad a Brodzeidd. Da schdedd auf amoll a Bayer in Lederhusn nebä na und will sich a mid hiehoggn. Abbä weil underm Diesch väm Görch a mordsdrümmä Hund lichd, frächd der Bayer:
"Entschuidigung, boasst ihr Hund?"
Deä Görch schaud auf den Lackl in seinä Lederhusn und auf den Hund und sachd dann:
"Naa, mei Hund beißd kann."
Da freud sich deä Bayer, hoggd sich na, abbä bävor er nuch a Bier beschdelln ka, had sich deä Krüppl fä am Hund saubä nein Bayern sei Waadn väbissn. Deä schreid:
"Jo, Kruzitürkn, Sie hom doch gsogt, ihr Hund boasst ned!"
Da lächeld der Görch und schiebd sich sei Dosnfleisch aufm Deller zärechd:
"Ja, desderda is ja aach ned mei Hund!"

Deä Schmiddn Aliis is hadd sich gedachdd, er machdd mid seinä Familie a weng an Ausfluch. Und desderweeng sin sa midm Zuch nach Schdaffelschdaa gfahrn und dann is die ganz Bagaasch naufm Schdaffelberch geloffn.

Wie sa dann endlich obm warn, had er sein Buum, den glaan Hansi, on die Kandn gschdelld, da wo die Fahna so schö im Wind fladderd und hadna alles gezeichdd: Väm Grabfeldgau bis weid nübä zsäm Frangnwald und aach die ganzn schmuckn Dörfla zä ihra Füß.
"Isses da undn ned schö?", had er sein Buum gfraachd. Da had der na bluäß agschaud und des Greina agfanga:
"Und mir habm uns den ganzn Wech da nauf schlebbm müssen, wus da undn so schö is???"

Deä Heiner, der Görch und der Alois hoggn aufm Keller und dringgn a wenla vor sich hie. Nach a paar Seidla sachd deä Heiner:

"Hobbdd ihr des fescha Maadla midm korzn, blaua Röckla gseng?"

Drei Seidla schbäder murmeld der Görch vor sich hie:

"Däs war ned blau, däs Röckla war schwarz!"

Sachd der Alois widdä drei Seidla schbäder:

"Wenner euch fei nuch weider so schdrädd, geh ich fei gleich haam!"

Wie dem Beckn Schorsch des Schderm aganga is und er ganz elendich auf seim Bedd geleng is, da hadd er zä seinä Fraa gsachd:

"Meicherla, du mussd mä nuch amoll in meim Lebm an gfalln dun!"

Sei Fraa had na agschaudd und mit Wasser in die Aang genickdd und gfrachd, was sie fä ihrn Schorsch machn ka. Deä hadd gsachd:

"Zieh dei schönsdes Kleida a und schdeck deä dei Haar nuch amoll so schö auf, wie damals, wie mir uns kenna gelerndd habm."

Da had sich sei Fraa gfreud und na gfraachd, ob er sa so schö als ledsdn Anblick in Erinnerung behaldn möchd.

Drauf had der Schorsch nur müd gelächeld und gsachd:

"Naa, aber wenn jedn Momendd der Duädd da durch die Düä kummdd, um aan zä holn, dann gfälldsdd du na välleichdd bessä als ich!"

Wie deä Müllersch Hannes välleichdd su zwaa oddä drei Wochn väheiärd war, isser nein Wäddshaus und had seim Schbezi, dem Schmiddn Bernd sei Leid geglaachd.

"Was hab ich da bluäß gemachdd??? Mei Fraa is seid deä Hochzich wie ausgewechsldd! Däbei war sie vor deä Hochzich deä reinsde Engel!"

Schaud der Bernd nei sei Seidla und sachd:

"Jaja, su issäs hald. Weä bei die Engerla bluäß auf die Flücherla schaud, dem bassierds leichd, dasser am End a Gans derwischdd!"

wu her? grob aweng ausm Kulmbachä Land.

Deä Görch liechd amoll nachds ganz elendlich im Schdraßngrabm neibä deä Kerng und schdöhnd und winseldd su laud, dass deä Pfarrä aufwachd und ganz derschroggn naus zäm Jammernden renndd.

"Ja um Goddes Willen, Görch!", is deä Pfarrä endsedsdd, "du wärsdd doch ned gar schderm? Soll ich dir die ledsdde Ölung geebm?"

Jammerd deä Görch:

"Liebä Herr Pfarrä, bluäß ka Öl und nix Feddiches mehr! Des zweida Schäuferla zärreisdd mer scho den Maang! Wenn, dann brauch ich an Schnaps!"

Wie deä Jesus mid seina Freund damals durchs heilicha Land geloffm is, da habm die Phariseä na widdä amoll a Sünderin vor die Füß gschdoßn, weil sie na habm väsuchn wölln.

Da hadd deä Jesus sich nedd lang bedachd und ärcherlich gsachd:

"Ihr wissdäs doch langsam! Weä fä euch ohna Sündn is, nur deä werfe den örschdn Schdaa!"

Auf amoll kummd fä hindn a glaans Kieserla gfloong und driffdd den Jeus grad so am Ohr.

Deä drehd sich rum und sachd:

"Muddä, wie ofd hab ich dir scho gsachdd, du sollsd mer ned nei die Ärbärd neiredn!"

Borkuuschd is abbä mehr so lichdenfelserisch, denk ich

Im Himmel gibdds an Bedriebsausfluuch. A jeeds überleechd wu mer nä hie könnd. Als örschdes überlechd Godd Vaddä sich nach Betlehem zä gehn, abbä da is die Maria dägechä, weils da ganz schlechd midd die Zimmä in die Herberng is.
Bei Jerusalem maant deä Jesus, dass er dägeechä wär, weil mer da ganz schnell aufs Kreuz geleechd wärd.
Da schaud sich deä Godd Vaddä aufm Globus a weng um sachd:

"Wie schauds denn mid Rom aus?"

Fliechd der Heilicha Geisd her und maand:

"Rom is gud, da war ich noch nie ...!!!"

Wo isn des?

koo saa